ৰুমী ।। প্ৰণৱ কুমাৰ বৰ্মন ।।

 ৰুমী

▪️প্ৰণৱ কুমাৰ বৰ্মন 

এটা চুফী সুৰত উতলা হৈ

তুমি হালিজালি আছিলা পাৰস্যত

পানীখাইতি ষ্টেচনত মই তোমাক নমাই থৈ আহিছিলোঁ

কাৰণ তুমি পাহাৰো ভাল পাইছিলা

চাদৰৰ আঁচলত বান্ধি বৈ ফুৰিছিলা জলপ্ৰপাত

এটি দুষ্ট শহাপহুৱে ভাকুটকুটাই দিছিল বুকুত তোমাৰ 

গোটেই বক্ষদেশ সিদিনাৰ পৰা ভেটফুলৰ পানী-বাগিচা

দেহ বিচাৰত দেহৰ অৰ্থ মাটি

আদিৰ আদিম পিয়াহ,অনাদিৰ দীঘল ভোকাতুৰ যাত্ৰা

লাগিব? বৰষুণৰ তানপূৰা?

গানেৰে মোক মাৰি মেঘত ওলমাই থ'বলৈ? 

লাগিব? খোজত নদীৰ নেপূৰ?

পথৰুৱা বাটৰ খোজৰ উমান পাবলৈ?

কন কন পখিলাৰ চুমাবোৰ তোমাৰ ওঁঠত পৰে

ফুল আহৰিত মিঠা মৌ পাণ কৰা তুমি

তুমি ৰুমী

চুফী নিৰ্জনতাৰ কন্ঠস্বৰ 

মোৰ শতিকাৰ ভোক

হৃদয় মাজে দৃশ্যমান!