যদি অপেক্ষা কৰা
▪️ প্ৰণৱ কুমাৰ বৰ্মন
যদি অপেক্ষা কৰা
শীতে বসন্তলৈ অপেক্ষা কৰাৰ দৰে
মোলৈ অপেক্ষা কৰিবা
যদি অপেক্ষা কৰা
মাটিয়ে মেঘলৈ বৰষুণ বিচাৰি অপেক্ষা কৰাৰ দৰে
যদি অপেক্ষা কৰা
অপৰাহ্নৰ আকাশে তৰাভৰা ৰাতিলৈ অপেক্ষা কৰাৰ দৰে
যদি অপেক্ষা কৰা
সৰাপাতবোৰে পুন: সেউজীয়া হৈ উঠাৰ সপোন দেখাৰ দৰে
ঘাটে নিসংগতা মচি এখনি নাওলৈ
অপেক্ষা কৰাৰ দৰে
তোমাৰ চুলিটাৰিয়ে অপেক্ষা কৰাৰ দৰে বতাহৰ বাবে
স্তব্ধতাই গান এটাৰ বাবে অপেক্ষা কৰাৰ দৰে
যদি অপেক্ষা কৰা
মোলৈ অপেক্ষা কৰিবা
তোমাৰ উপেক্ষা নেওচি
মই এদিন নহয় এদিন আহিম!
▪️▪️▪️
0 Comments